Janapadham_EPaper_TS_09-11-2024
బుల్డోజర్లతో తొక్కిస్తా…
అడ్డుపడేదెవరో దమ్ముంటే పేర్లు చెప్పండి..
మూసీ పునరుజ్జీవం జరిగి తీరుతుంది..
సంగెం శివయ్య దగ్గర సంకల్పం తీసుకున్నా..
ప్రక్షాళన చేసి తీరుతా…
మూసీ పాదయాత్రలో కార్నర్ మీటింగ్ లో సీఎం రేవంత్ రెడ్డి
జనపదం, భువనగిరి :
‘‘మూసీని ప్రక్షాళన చేసి తీరుతానని శివయ్య దగ్గర సంకల్పం తీసుకున్నా… బుల్డోజర్లకు అడ్డుపడుతామన్న వాళ్లెవరో పేర్లు ఇవ్వండి.., నల్లగొండ ప్రజలతో కలిసి వచ్చి అడ్డుకునే వాళ్లపై బుల్డోజర్లు తీసుకుపోతానని… లేకుంటే నా పేరు మార్చుకుంటా…’’ అని ముఖ్యమంత్రి రేవంత్ రెడ్డి అన్నారు. శుక్రవారం మూసీ పాదయాత్ర కార్నర్ మీటింగ్ లో సీఎం రేవంత్ రెడ్డి మాట్లాడుతూ ఒకనాడు మంచినీటిని అందించిన మూసీ ఇప్పుడు మురికి కూపంగా మారి విషాన్ని చిమ్ముతోందన్నారు. పాలకులు పగ పట్టారా.. దేవుడు శాపం పెట్టిండా.. అని మూసీ పరివాహక ప్రాంత ప్రజలు బాధపడుతున్నారని మూసీ పునరుజ్జీవింప చేయాలని కోరుతున్నారని చెప్పారు. ఈ ప్రాంతంలో కులవృత్తులు చేసుకునే పరిస్థితి లేదు.. ఇక్కడి చెరువుల్లో చేపలు బతికే పరిస్థితి లేదు.. ఇక్కడ పండిన పంటలను తినే పరిస్థితి లేదు.. ఇక్కడ పశువుల పాలు తాగాలన్నా ఆలోచించాల్సిన దుస్థితి ఏర్పడిందని ఆవేదన వ్యక్తం చేశారు. పాడిపంటలతో ఎంతో సంతోషంగా బతికిన ఇక్కడి ప్రజలు.. ఇపుడు భూములు అమ్ముకోవాల్సిన పరిస్థితి నెలకొందన్నారు.
అడ్డుకోవాలని చూస్తున్నారు..
బీఆర్ఎస్ నేతలకు దోచుకోవడమే తప్ప ప్రజలకు మేలు చేయడం తెలియదని అందుకే మూసీ ప్రక్షాళనను అడ్డుకోవాలని చూస్తున్నారని చెప్పారు. మూసీ ప్రక్షాళనకు అండగా ఉంటామని చెప్పిన కమ్యూనిస్టు సోదరులకు ధన్యవాదాలు తెలిపారు. మూసీ కాలుష్యంతో ఇక్కడి ప్రజలు అణుబాంబు కంటే ప్రమాదాన్ని ఎదుర్కోబోతున్నారని ఆవేదన వెలిబుచ్చారు. వరంగా ఉండాల్సిన మూసీ శాపంగా మారుతోందని అందుకే మూసీ ప్రక్షాళన చేయాలో లేదో ఒక్కసారి ఆలోచించండని ప్రజలను కోరారు. మోదీ గుజరాత్ ను బాగు చేసుకోవచ్చు కానీ మేం మూసీని బాగుచేసుకోవద్దా అని బీజేపీ నాయకులని ప్రశ్నించారు. ఇది నా జన్మదినం కాదు… ఇక్కడికి రావడంతో నా జన్మ ధన్యమైందన్నారు. కేసీఆర్ నీ బిడ్డ మూడు నెలలు జైలుకు పోతేనే నీకు దుఃఖం వస్తే… మూసీ పరివాహక బిడ్డల జీవితాలు పోతుంటే నీకు పట్టదా..? అని ప్రశ్నించారు. నల్లగొండ ప్రజలు నీకు ఓట్లు వేయలేదనా కేసీఆర్..? మూసీ ప్రక్షాళన అడ్డుకోవాలని చూస్తున్నావన్నారు. నల్లగొండ జిల్లా పౌరుషాల గడ్డ… మూసీ ప్రక్షాళనను అడ్డుకుంటే మూసీలోనే పాతరేస్తారని చెప్పారు. వాళ్ల అవినీతి కోసం, వాళ్ల దోపిడీ కోసం మూసీని అడ్డుకోవాలని చూస్తున్నారని ఆవేదన వ్యక్తం చేశారు.
ఇవాళ్టి పాదయాత్ర ట్రైలర్ మాత్రమే.. అసలు సినిమా ముందుంది సీఎం అన్నారు. బిల్లా, రంగాలకు సవాల్ విసురుతున్నా.. 2025 జనవరి మొదటి వారంలో వాడపల్లి నుంచి హైదరాబాద్ వరకు పాదయాత్ర మొదలు పెడతా.., బిల్లా రంగాలు రావాలి.. మిమ్మల్ని ఇక్కడి ప్రజలు రానిస్తారో.. నడుముకు తాడుకట్టి మూసీలో ముంచేస్తారో చూద్దామని సీఎం రేవంత్ రెడ్డి సవాల్ విసిరారు.
కార్యక్రమంలో రాష్ట్ర సినిమా ఆటోగ్రఫీ శాఖ మంత్రి కోమటిరెడ్డి వెంకటరెడ్డి, ప్రభుత్వ విప్ ఆలేరు ఎమ్మెల్యే బీర్ల ఐలయ్య, ఎంపీ చామల కిరణ్ కుమార్ రెడ్డి, భువనగిరి ఎమ్మెల్యే కుంభం అనిల్ కుమార్ రెడ్డి, తుంగతుర్తి ఎమ్మెల్యే మందుల సామెల్, నకిరేకల్ ఎమ్మెల్యే వేముల వీరేశం, కాంగ్రెస్ నాయకులు పాల్గొన్నారు.
