హైద‌రాబాద్ : కాంగ్రెస్ ప్ర‌భుత్వంపై బీఆర్ఎస్ వ‌ర్కింగ్ ప్రెసిడెంట్ కేటీఆర్ (KTR) నిప్పులు చెరిగారు. రైతుల‌ను కాంగ్రెస్ ప్ర‌భుత్వం న‌ట్టేట ముంచింద‌ని మండిప‌డ్డారు. ప్ర‌తి గింజ‌కు బోన‌స్ ఇస్తామ‌ని ప్ర‌చారంలో ఊద‌ర‌గొట్టిన కాంగ్రెస్.. ప్ర‌భుత్వంలోకి రాగానే చేతులెత్తేస్తారా..? అని కేటీఆర్ ధ్వ‌జ‌మెత్తారు. స‌న్న వ‌డ్ల‌కే బోన‌స్ అని ప్ర‌క‌టించిన కాంగ్రెస్ ప్ర‌భుత్వాన్ని ఎక్స్ వేదిక‌గా కేటీఆర్ నిల‌దీశారు.

కాంగ్రెస్ గ్యారెంటీ కార్డులో వ‌రి ధాన్యానికి రూ. 500 బోనస్ అని ప్రకటించి.. ఇప్పుడు సన్న వడ్లకు మాత్రమే అని సన్నాయి నొక్కులు నొక్కుతారా..? అంటూ కేటీఆర్ తీవ్ర ఆగ్ర‌హం వ్య‌క్తం చేశారు. ఇది ప్రజా పాలన కాదు.. రైతు వ్యతిరేక పాలన అని విమ‌ర్శించారు. నిన్నటిదాకా సాగునీరు ఇవ్వక సావగొట్టారు.. కరెంట్ కోతలతో పంటలను ఎండగొట్టారు.. కష్టించి పండించిన ధాన్యాన్ని కొనకుండా అకాల వర్షాలపాలు చేసి ఆగం చేశారని కేటీఆర్ అన్నారు.

ఓట్ల నాడు ఒకమాట.. నాట్ల నాడు మరోమాట..

ప్రతి ఏటా రైతులు, కౌలు రైతులకు రూ.15 వేలు రైతుభరోసా అన్నారు.. ఇవ్వలేదు. వ్యవసాయ కూలీలకు రూ. 12000 వేలు అన్నారు.. వేయలేదు. ప్రతి రైతుకు డిసెంబర్ 9నే.. రెండు లక్షల రుణమాఫీ అన్నారు.. చేయలేదు. నేడు బోనస్ విషయంలో కూడా ప్రభుత్వ బోగస్ విధానాన్ని బయటపెట్టారు. ఓట్ల నాడు ఒకమాట.. నాట్ల నాడు మరోమాట చెప్పడమే కాంగ్రెస్ నైజం. అసెంబ్లీ ఎన్నికల్లో గాలిమాటలతో గారడీ చేసింది.. కాంగ్రెస్ పార్టీ అని కేటీఆర్ తీవ్రంగా విమ‌ర్శించారు.

కాంగ్రెస్ సర్కారుకు కౌంట్ డౌన్ షురూ..

పార్లమెంట్ ఎన్నికల్లో ఓట్లు డబ్బాలో పడగానే.. నాలుగు కోట్ల ప్రజల సాక్షిగా తన నిజస్వరూపాన్ని బయటపెట్టింది.. కాంగ్రెస్ సర్కార్. ఎద్దేడ్సిన యవుసం.. రైతేడ్చిన రాజ్యం నిలబడదు.. నమ్మి ఓటేసినందుకు.. రైతుల గొంతు కోసిన కాంగ్రెస్ సర్కారును అన్నదాతలు ఇక వదిలిపెట్టరు.. పల్లె పల్లెనా ప్రశ్నిస్తారు.. తెలంగాణ వ్యాప్తంగా నిలదీస్తారు.. కపట కాంగ్రెస్ పై సమరశంఖం పూరిస్తారు.. నేటి నుంచి రైతన్నల చేతిలోనే.. కాంగ్రెస్ సర్కారుకు కౌంట్ డౌన్ షురూ.. అయింద‌ని కేటీఆర్ పేర్కొన్నారు.