JanaPadham_EPaper_TS_7-09-2024
*విగ్రహం.. వివాదం.. *
సర్కారుపై సమరం
బీఆర్ఎస్, కాంగ్రెస్ ల మధ్య మళ్లీ లొల్లి..
రాజకీయాలను వేడెక్కించిన రాజీవ్ విగ్రహావిష్కరణ
టచ్ చేస్తే తడాఖా చూపిస్తామని హస్తం హెచ్చరిక..
తెలంగాణ తల్లి విగ్రహాల పాలభిషేకాలకు గులాబీ పిలుపు..
గతంలో అదే స్థానంలో తెలంగాణ తల్లి విగ్రహం
మార్చిన కాంగ్రెస్.. పోరుబాటుకు గులాబీ దళం
ఇటీవల వరుసగా సర్కారుపై ఎదురుదాడికి ప్లాన్
రాజుకున్న కుంపటి మరింత రగులుకుంటున్నది. ఎక్కడెక్కడో జరుగుతున్న పంచాయితీ రాజధాని నడిబొడ్డుకు చేరింది. సచివాలయం సాక్షిగా అధికార, విపక్షాలు సమర శంఖం పూరిస్తున్నాయి. పార్టీ పెద్దల మెప్పునకు హస్తం., యావత్ రాష్ట్ర ప్రజల ఆకాంక్ష కోసం గులాబీ మధ్య రణం ముదురుతున్నది. తెలంగాణ తల్లి విగ్రహం ఉంచాల్సిన చోట రాజీవుడిది ఏర్పాటు చేయడంతో కారు నేతలు విమర్శలకు దిగడం., కౌంటర్ గా ప్రభుత్వ పెద్దలు నోటికొచ్చినట్టు వదిలేయడంతో విగ్రహం చుట్టూ రాజకీయం పెనవేసుకుంటున్నది. నిగ్రహం కోల్పోతున్న నేతలు సవాళ్లు.., ప్రతిసవాళ్లు విసురుకుంటూ లొల్లిని గల్లీ వరకు తీసుకెళ్తున్నారు. పట్టువిడవకుండా ఎవరికి వారుగా ముందుకు సాగుతున్నారు. అధికార దర్పానికి వ్యతిరేకంగా తల్లి విగ్రహాలను పాలతో కడగాలని ప్రతిపక్షం పిలువునివ్వగా, అన్నీ రాజకీయ స్టాంట్లు అంటూ వాళ్లు కొట్టిపారేస్తున్నారు. నిన్నటి వరకు ఫిరాయింపుల జగడంతో ఆగమాగమైన రాష్ట్ర పరిస్థితి తాజాగా విగ్రహ వివాదంతో మరెన్ని మలుపులు తిరుగుతుందో..?
=====================
జనపదం, బ్యూరో
పరస్పరం సవాళ్లు…. ప్రతి సవాళ్లు విసురుకుంటూ రాజకీయాలు హీటెక్కిస్తున్న అధికార కాంగ్రెస్, ప్రధాన ప్రతిపక్షమైన బీఆర్ఎస్ పార్టీల మధ్య తాజాగా విగ్రహ వివాదం మొదలైంది. ఇది ఇప్పుడు ఆ రెండు పార్టీల మధ్య మరింత అగ్గిని రాజేస్తోంది. ఈ పరిణామాన్ని తమకు అనుకూలంగా మలుచుకుని తెలంగాణ సెంటిమెంట్ ను మళ్లీ ఆయుధంగా మలుచుకోవాలని బీఆర్ఎస్ యత్నిస్తుండగా తెలంగాణ ముసుగులో గులాబీ నేతలు చేస్తున్న రాజకీయ దూకుడుకు కళ్లం వేసే విధంగా అధికార కాంగ్రెస్ వ్యూహాలకు పదనుపెడుతోంది. దీంతో రాష్ట్ర రాజకీయాలు రోజుకో మలుపు తిరుగుతున్నాయి. హస్తం, గులాబీ పార్టీల మధ్య నెలకొన్న ఆధిపత్య పోరు ప్రస్తుతం ప్రజల్లో తీవ్ర ఆసక్తిని రేపుతున్నాయి. కాంగ్రెస్ ప్రభుత్వంపై పూర్తి స్థాయిలోపై చేయి సాధించాలని గులాబీ, ఆ పార్టీని అదే అంశంతో పాతాలానికి తొక్కాలని అధికార పార్టీ ఉవ్విళ్లూరుతున్నాయి. దీంతో రెండు పార్టీలో ఏదో ఒక వివాదం చోటుచేసుకుంటోంది. ఇప్పటికే అనేక అంశాలపై బీఆర్ఎస్, కాంగ్రెస్ పార్టీల నేతలు పరస్పరం బహిరంగంగానే విరుచుకుపడుతున్నారు. కొన్ని సందర్భాల్లో అయితే దాడులకు సైతం పాల్పడుతున్నారు. ఇందుకు శాసనసభ్యులు కౌశిక్ రెడ్డి, అరికెపూడి గాంధీ మధ్య నాలుగు రోజుల క్రితం జరిగిన ఘర్షణ ఉదాంతాన్ని ఇంకా ప్రజలు మరవకముందే తాజాగా విగ్రహ వివాదం రాజుకుంది.
తెలంగాణ తల్లి కోసం..
సచివాలయం ముందు తెలంగాణ తల్లి విగ్రహం ఏర్పాటు కోసం బీఆర్ఎస్ ప్రభుత్వం స్థలాన్ని కేటాయించింది. అయితే రాష్ట్రంలో ప్రభుత్వం మారి కాంగ్రెస్ అధికారాన్ని చేపట్టింది. దీంతో రేవంత్ సర్కార్ గత ప్రభుత్వం కేటాయించిన స్థలంలో మాజీ ప్రధాన మంత్రి రాజీవ్ గాంధీ విగ్రహాన్ని సోమవారం ఏర్పాటు చేసింది. దీనిపై బీఆర్ఎస్ తీవ్ర ఆగ్రహం వ్యక్తం చేస్తూ మంగళవారం నిరసనలకు పిలుపునిచ్చింది. ఇందులో భాగంగా రేవంత్ సర్కార్ తీసుకున్న నిర్ణయాన్ని గర్హిస్తూ రాష్ట్ర వ్యాప్తంగా ఉన్న తెలంగాణ తల్లి విగ్రహాలకు పాలాభిషేకాలకు పిలుపునిచ్చింది. అలాగే తమ ప్రభుత్వం వచ్చిన వెంటనే రాజీవ్ గాంధీ విగ్రహాన్ని తొలగించి అదే స్థానంలో తెలంగాణ తల్లి విగ్రహం ఏర్పాటు చేస్తామని గులాబీ పార్టీ స్పష్టం చేసింది. దీనిపై కాంగ్రెస్ సర్కార్ భగ్గుమంది. రాజీవ్ గాంధీ విగ్రహాన్ని దమ్ముంటే టచ్ చేసి చూడండి అంటూ రాష్ట్ర బీసీ సంక్షేమ శాఖ మంత్రి, హైదరాబాద్ జిల్లా ఇన్ చార్జీ మంత్రి పొన్నం ప్రభాకర్ ఘాటుగా బీఆర్ఎస్ నేతలను హెచ్చరించారు. దీంతో గులాబీ, హస్తం పార్టీల విగ్రహ రగడ ప్రస్తుతం పతాకస్థాయికి చేరుకున్నట్లుగా కనిపిస్తోంది. ఈ నేపథ్యంలో భవిష్యత్తు రాజకీయ పరిణామాలు మరింత ఆసక్తిని కలిగించనున్నాయని తెలుస్తోంది. అయితే ఈ పోరులో ఎవరు పైచేయి సాధిస్తారు, ఎవరికి ఆశాభంగం కలుగుతుందన్న అంశంపై స్పష్టత రావాలంటే స్థానిక సంస్థల ఎన్నికల సమరం వరకు వేచి చూడాల్సిందే.
