హైద‌రాబాద్‌: రాష్ట్రంలోని డిగ్రీ కాలేజీల్లో ప్రవేశాల కోసం దోస్త్ (DOST) నోటిఫికేషన్‌ను ఉన్న‌త విద్యామండ‌లి విడుద‌ల చేసింది. ఈ నెల 6 నుంచి రిజిస్ట్రేషన్ల ప్రక్రియ ప్రారంభమవుతుంది. దీనిద్వారా ఉస్మానియా వర్శిటీ, కాకతీయ, తెలంగాణ, పాలమూరు, మహాత్మగాంధీ, శాతవాహన, మ‌హిళా విశ్వవిద్యాలయాల పరిధిలోని డిగ్రీ కళాశాలతోపాటు జేఎన్‌టీయూ అందిచే డిగ్రీ కోర్సులు, పాలిటెక్నిక్‌లో డీ-ఫార్మ కోర్సుల్లో మొద‌టి సంవ‌త్స‌రం సీట్లను భ‌ర్తీ చేస్తారు. మొత్తం మూడు విడుతల్లో సీట్ల భర్తీని పూర్తి చేయనున్నారు.
దోస్త్ రిజిస్ట్రేషన్ ఫీజులు..
మొత్తం 3 విడుతల్లో డిగ్రీ ప్రవేశాల ప్రక్రియను ఉన్న‌త విద్యామండ‌లి పూర్తి చేయనుంది. దీనికోసం విద్యార్థులు నిర్ణీత మొత్తంలో ఫీజు చెల్లించాల్సి ఉంటుంది. మొద‌టి ఫేజ్‌లో రిజిస్ట్రేషన్ చేసుకునే విద్యార్థులు రూ.200 చెల్లించాలి. అదేవిధంగా మూడో విడుత‌కు రూ.400 చెల్లించి ఆన్‌లైన్‌లో రిజిస్ట్రేషన్ చేసుకోవాల్సి ఉంటుంది.
రిజిస్ట్రేషన్ల ముఖ్యమైన తేదీలు..
- ఫస్ట్ ఫేజ్ రిజిస్ట్రేషన్ల ప్రక్రియ మే 6న ప్రారంభమవుతుంది.
- అర్హత గల విద్యార్థులు మే 25 వరకు రిజిస్ట్రేషన్ చేసుకోవ‌చ్చు.
- ఆ తర్వాత వెబ్ ఆప్షన్లు ఎంచుకోవాలి. మే 15నుంచి 27 వరకు ఈ అవకాశం ఉంటుంది.
- తొలి విడుత సీట్లను జూన్ 3న కేటాయిస్తారు.
- సీట్లు పొందిన విద్యార్థులు జూన్ 4 నుంచి 10వ తేదీలోపు ఆయా కాలేజీల్లో విద్యార్థులు రిపోర్ట్ చేయాలి.
- రెండో విడత రిజిస్ట్రేషన్లు జూన్ 4న ప్రారంభం అవుతాయి. 13వ తేదీ వరకు రిజిస్ట్రేషన్ చేసుకోవ‌చ్చు.
- జూన్ 4 నుంచి 14 వరకు వెబ్ ఆప్ష‌న్స్ ఇచ్చుకోవాలి.
- రెండో విడత సీట్లను జూన్ 18న కేటాయిస్తారు.
- సీట్లు పొందిన విద్యార్థులు జూన్ 19 నుంచి 24 లోపు ఆయా కాలేజీల్లో సెల్ఫ్‌ రిపోర్ట్ చేయాలి.
- చివరిదైన మూడో విడుత రిజిస్ట్రేషన్ జూన్ 19న ప్రారంభం అవుతుంది. అదేనెల 25 వరకు
- విద్యార్థులు త‌మ పేర్ల‌ను న‌మోదుచేసుకోవ‌చ్చు.
- జూన్ 19 నుంచి 26 వరకు వెబ్ ఆప్షన్లు ఇవ్వాల్సి ఉంటుంది.
- జూన్ 29న సీట్లను కేటాయిస్తారు.
- జూలై 3వ తేదీలోపు విద్యార్థులు కాలేజీల్లో రిపోర్ట్ చేయాలి.
- జూలై 7 నుంచి డిగ్రీ తరగతులు ప్రారంభమవుతాయి.
రిజిస్ట్రేషన్ ఎలా చేసుకోవాలంటే..
విద్యార్థులు దోస్త్ అధికారిక వెబ్‌సైట్ https://dost.cgg.gov.in/ ను సందర్శించాలి.
ఇందులో Candidate Pre-Registration అనే ఆప్ష‌న్‌పై క్లిక్ చేసి రిజిస్ట్రేషన్ చేసుకోవాలి.
ముందుగా Application Fee Payment పై క్లిక్ చేసి ఫీజును చెల్లించాలి.
Candidate Login ద్వారా ఆప్షన్లను ఎంచుకోవచ్చు.
