Dubai Duty Free | దుబాయి డ్యూటీ ఫ్రీ మిలీనియం మిలియనీర్ డ్రాలో భారతీయ మహిళకు జాక్పాట్ తగిలింది. స్థానిక ఇంటర్నేషనల్‌ ఎయిర్‌పోర్ట్‌లో దుబాయి డ్యూటీ ఫ్రీ మిలీనియం మిలియనీర్ ప్రమోషన్ కోసం డ్రా జరిగింది. ఇందులో పంజాబ్‌కు చెందిన పాయల్ అనే మహిళ మిలియన్ డాలర్లు గెలుచుకున్నది. భారతీయ కరెన్సీలో అక్షరాలా రూ.8.3కోట్లు. అయితే, గత ఏప్రిల్‌లో పెళ్లిరోజు కానుకగా భర్త ఇచ్చిన నగదుతో ఆమె ఆన్‌లైన్‌లో లాటరీ టికెట్‌ను కొన్నది. లాటరీ టికెట్‌తో ఆమెకు అదృష్టం తెచ్చింది. ఈ నెల 16 తీసిన డ్రాలో ఆమె కొనుగోలు చేసిన లాటరీ టికెట్ నం.3337కు జాక్పాట్ తగిలింది. దీంతో రూ.8.3 కోట్ల భారీ ప్రైజ్‌మనీ ఆమె సొంతమైంది. గత 12 సంవత్సరాలుగా ఆమె దుబాయి లాటరీలో అదృష్టం పరీక్షించుకుంటుండడం గమనార్హం.
ఏడాదికి ఒకటి, రెండు టికెట్లను భర్త, పిల్లల పేరుపై లాటరీ టికెట్లు కొనుగోలు చేస్తున్నట్లుగా పాయల్ పేర్కొంది. భారీ మొత్తంలో ప్రైజ్‌మనీ గెలుచుకోవడంపై హర్షం వ్యక్తం చేసింది. ప్రైజ్‌మనీలోని కొంత భాగం పిల్లల భవిష్యత్‌కు, మరికొంత ఆస్ట్రేలియాలో ఉంటున్న తన సోదరుడికి సాయం అందించనున్నట్లు తెలిపింది. ఈ సందర్భంగా లాటరీ నిర్వాహకులకు ఆమె ధన్యవాదాలు తెలిపారు. ఇదిలా ఉండగా.. 1999లో దుబాయి డ్యూటీ ఫ్రీ రాఫెల్‌లో ఇప్పటి వరకు మిలియన్ డాలర్లు గెలుచుకున్న భార‌తీయుల్లో పాయల్ 229వ వ్యక్తికావడం విశేషం. డ్యూటీ ఫ్రీ రాఫెల్ టికెట్ల కొనుగోలుదారుల్లో ఎక్కువ మంది భార‌తీయులేన‌ని లాటరీ నిర్వాహ‌కులు పేర్కొంటున్నారు.
