Rythu Bharosa | పంట పెట్టుబ‌డి సాయం పంపిణీకి మ‌రోసారి బ్రేక్ ప‌డింది. రైతు భరోసా (Rythu Bharosa) చెల్లింపులపై కేంద్ర ఎన్నికల సంఘం (EC) ఆంక్షలు విధించింది. లోక్సభ ఎన్నికల నేపథ్యంలో ఈ నెల 13న పోలింగ్ ముగిసిన తర్వాతే రైతుల ఖాతాల్లో నగదు జమ చేయాలని స్పష్టం చేసింది. ఈ నెల 9 లోపు రాష్ట్రంలోని రైతులంద‌రికి చెల్లింపులు చేస్తామని సీఎం రేవంత్ రెడ్డి ప్ర‌క‌టించిన విష‌యం తెలిసిందే. ఇప్పటికే ఐదెకరాల కంటే ఎక్క‌వ భూమి ఉన్న రైతుల ఖాతాల్లో నగదు జమ కూడా ప్రారంభ‌మైంది. అయితే సీఎం రేవంత్ వ్యాఖ్యలపై ఎన్.వేణు కుమార్ అనే వ్యక్తి ఈసీకి ఫిర్యాదు చేశారు.
దీంతో రాష్ట్ర ప్రధాన ఎన్నికల అధికారి నుంచి ఈసీ నివేదిక తెప్పించుకున్న‌ది. ఇప్పటికే కొనసాగుతున్న పథకాలకు సంబంధించిన నగదు బదిలీకి ఎలాంటి ప్రచారం లేకుండా గతంలో అనుమతించినట్లు ఈసీ తెలిపింది. గత శాసనసభ ఎన్నికల సమయంలో కూడా అప్పటి ఆర్థిక మంత్రి ఎన్నికల ప్రవర్తనా నియమావళిని ఉల్లంఘించినందుకు రైతుబంధు చెల్లింపులకు అనుమతి నిలిపివేసినట్లు పేర్కొంది. కాగా, సీఎం రేవంత్ రెడ్డి 9వ తేదీలోగా చెల్లింపులు పూర్తి చేస్తామని చెప్పడం ఎన్నికల ప్రవర్తనా నియమావళి ఉల్లంఘనేనని ఎన్నికల సంఘం స్పష్టం చేసింది. లోక్సభ ఎన్నికల పోలింగ్ తర్వాతే రైతుభరోసా నిధులను విడుదల చేయాలని వెల్ల‌డించింది.
ఐదెకరాలు పైబడి వ్యవసాయ భూమి ఉన్న వారికి రైతుభరోసా నిధులను ఈ నెల 6న రాష్ట్ర ప్రభుత్వం విడుదల చేసింది. ఐదెకరాల లోపు ఉన్న రైతులకు గతంలో ప్రభుత్వం నిధులు ఇచ్చింది. ఈ నేపథ్యంలోనే ఐదెకరాల పైబడిన వారికి కూడా రైతుభరోసా నిధుల చెల్లింపులు ప్రారంభించింది. ఈ మేరకు రైతుల ఖాతాల్లో నగదును ప్రభుత్వం జమ చేసింది. రూ.2 వేల కోట్లకు పైగా నిధులను విడుదల చేసినట్లు సమాచారం. మూడు రోజుల్లో చెల్లింపుల ప్రక్రియ పూర్తవునుండ‌గా ఈసీ ఆదేశాలతో రైతుల ఖాతాల్లో నగదు జమ చేసే ప్రక్రియ ఆగిపోయింది.
