Telangana | హైద‌రాబాద్ : తెలంగాణ వ్యాప్తంగా ఈ నెల 13వ తేదీన లోక్‌స‌భ ఎన్నిక‌ల‌కు పోలింగ్ జ‌ర‌గ‌నుంది. లోక్‌స‌భ ఎన్నిక‌ల‌తో పాటు సికింద్రాబాద్ కంటోన్మెంట్ అసెంబ్లీకి కూడా ఉప ఎన్నిక జ‌ర‌గ‌నుంది. ఇక 13వ తేదీతో తెలంగాణ‌లో ఎన్నిక‌ల కోలాహ‌లం ముగిసిపోతుంద‌నుకుంటే పొర‌పాటే. మే 27వ తేదీ వ‌ర‌కు ఎన్నిక‌ల హ‌డావుడి కొన‌సాగ‌నుంది. ఎందుకంటే.. వరంగల్ – ఖమ్మం – నల్లగొండ పట్టభద్రుల ఎమ్మెల్సీ ఉప ఎన్నికకు మే 27వ తేదీన పోలింగ్ జ‌ర‌గ‌నుంది. కాబ‌ట్టి తెలంగాణ‌లో ఆ రోజు వ‌ర‌కు ఎన్నిక‌ల వేడి కొన‌సాగ‌నుంది.
వరంగల్ – ఖమ్మం – నల్లగొండ పట్టభద్రుల ఎమ్మెల్సీ ఉప ఎన్నికకు నిన్న‌టితో నామినేష‌న్ల గ‌డువు ముగిసింది. ఇవాళ నామినేష‌న్ల‌ను ప‌రిశీలించ‌నున్నారు.నామినేష‌న్ల ఉప‌సంహ‌ర‌ణ‌కు గ‌డువు మే 13. అయితే గ‌తేడాది డిసెంబ‌ర్‌లో జరిగిన అసెంబ్లీ ఎన్నికల్లో పల్లా రాజేశ్వర్ రెడ్డి జ‌న‌గాం నుంచి గెలుపొందారు. అప్ప‌టికే ఆయన ఎమ్మెల్సీగా ఉండ‌డంతో.. డిసెంబ‌ర్ 9న ఎమ్మెల్సీకి రాజీనామా చేశారు. దీంతో ఈ పట్టభద్రుల నియోజ‌క‌వ‌ర్గంలో ఉప ఎన్నిక అనివార్య‌మైంది. 2021 మార్చిలో పల్లా రాజేశ్వర్ రెడ్డి ఎమ్మెల్సీగా ఎన్నికవగా.. 2027, మార్చి వరకూ పదవీకాలం ఉంది. ఎమ్మెల్సీ స్థానం ఖాళీ అయినప్పటి నుంచి ఆరు నెలల్లోగా ఉప ఎన్నిక నిర్వహించాలన్న నిబంధన మేరకు ఈసీ షెడ్యూల్ ప్రకటించింది. ఈ 27న ఉప ఎన్నికకు పోలింగ్ నిర్వహించనుంది. జూన్ 5న ఓట్ల లెక్కింపు చేప‌ట్ట‌నున్నారు.
అభ్య‌ర్థులు వీరే..
వరంగల్ – ఖమ్మం – నల్లగొండ పట్టభద్రుల నియోజ‌క‌వర్గానికి కాంగ్రెస్ త‌ర‌పున తీన్మార్ మల్లన్న, బీఆర్ఎస్ నుంచి రాకేశ్ రెడ్డి, బీజేపీ నుంచి గుజ్జుల ప్రేమేందర్ రెడ్డి బ‌రిలో ఉన్నారు. ఇక నిరుద్యోగుల త‌ర‌పున పాలకూరి అశోక్ కుమార్ పోటీ చేస్తున్నారు. వీరి మ‌ధ్యే ప్ర‌ధాన‌మైన పోటీ ఉంది.
తీన్మార్ మల్లన్న
గ‌తంలో ఇదే నియోజకవర్గం నుంచి తీన్మార్ మల్లన్న ఇండిపెండెంట్ గా పోటీ చేసి రెండో స్థానంలో నిలిచారు. ఈ ఉప ఎన్నికల్లో కాంగ్రెస్ అభ్యర్థిగా గెలిచి తీరాలని తీన్మార్ మల్లన్న గట్టి ప్రయత్నాలు చేస్తున్నారు. సాధారణ రాజకీయ నేతలతో పోలిస్తే ఆయనది భిన్నమైన శైలి. నామినేషన్ వేయగానే తనతో పాటు తన కుటుంబానికి ఉన్న ఆస్తులన్నింటినీ ప్రభుత్వానికి రాసిచ్చేశారు. తీన్మార్ మల్లన్న పబ్లిసిటీ స్టంట్ చేశారని అనుకున్నారు. కానీ ఆయన పత్రాలు రిజిస్టర్ కూడా చేసేశారు. పనితీరు ఆధారంగా తనపై తానే రీకాల్ సిస్టమ్ కూడా పెట్టుకుంటానని చెబుతున్నారు.
రాకేశ్ రెడ్డి
వరంగల్ జిల్లాకు చెందిన రాకేశ్ రెడ్డి 2023 అసెంబ్లీ ఎన్నిక‌ల‌కు ముందు బీజేపీని వీడి బీఆర్ఎస్ పార్టీలో చేరారు. పార్టీలో చేరిన ఆరు నెల‌ల‌కే ఎమ్మెల్సీ టికెట్ కొట్టేశారు. సామాన్య రైతు కుటుంబం నుంచి వ‌చ్చిన రాకేశ్ రెడ్డి.. బిట్స్ పిలానీలో మాస్ట‌ర్ మేనేజ్‌మెంట్ స్ట‌డీస్, మాస్ట‌ర్స్ ఇన్ ఫైనాన్స్ పూర్తి చేశారు. బెంగళూరు, అమెరికాలలో ఏడేళ్ల పాటుఉద్యోగాలు చేసిన ఆయన రాజకీయాలపై ఆసక్తితో రాజకీయాల్లోకి ప్రవేశించారు. 2013లో బీజేపీలో చేరి ప్రత్యక్ష రాజకీయాల్లోకి అడుగుపెట్టారు. అంచెలంచెలుగా ఎదుగుతూ బీజేపీలో బీజేవైఎం రాష్ట్ర కార్యదర్శిగా, రెండు పర్యాయాలు రాష్ట్ర అధికార ప్రతినిధిగా పనిచేశారు. బీజేపీలో వరంగల్ పశ్చిమ టికెట్ ఆశించిన రాకేష్ రెడ్డికి టికెట్ కేటాయించ‌క‌పోవ‌డంతో 2023, న‌వంబ‌ర్‌లో బీఆర్ఎస్ పార్టీలో చేరారు. యువతలో, విద్యావంతులలో మంచి పట్టున్న రాకేష్ రెడ్డికి రాష్ట్ర వ్యాప్తంగా అభిమానులు, ఫాలోయింగ్ ఉండటంతో ఎమ్మెల్సీ అభ్యర్థిగా కేసీఆర్ అవకాశం ఇచ్చారు.
గుజ్జుల ప్రేమేందర్ రెడ్డి
గత ఎన్నికల్లోనూ గుజ్జుల ప్రేమేందర్ రెడ్డి పట్టభద్రుల స్థానం నుంచి పోటీ చేసి ఓటమి చవి చూశారు. కాసం వెంకటేశ్వర్లు, ప్రకాశ్‌రెడ్డి కూడా టిక్కెట్ కోసం ప్రయత్నించారు. సాధారణంగా గ్రాడ్యూయేట్స్ ఎమ్మెల్సీ ఎన్నిక అంటే.. రాజకీయ పార్టీలు ముందుగా తమ శక్తి మేర సానుభూతిపరుల్ని ఓటర్లుగా చేర్పిస్తాయి. ఈ సారి అలాంటి కసరత్తు ఏ పార్టీ చేయలేదు. అందుకే ఎవరు గెలుస్తారన్నది ఆసక్తికరంగా మారింది. మూడేళ్ల కిందట జరిగిన ఎన్నికల్లో ఏ పార్టీ మద్దతు లేకపోయినప్పటికీ తీన్మార్ మల్లన్న రెండో స్థానంలో నిలిచారు.
పాలకూరి అశోక్ కుమార్
నల్లగొండ-ఖమ్మం-వరంగల్ పట్టభద్రుల ఎమ్మెల్సీ స్వతంత్ర అభ్యర్థిగా పోటీచేస్తున్న పాలకూరి అశోక్ కుమార్ తన మ్యానిఫెస్టోను విడుదల చేశారు. నిరుద్యోగుల త‌ర‌పున గత కొన్నేండ్ల నుంచి పోరాటం చేస్తున్నారు. గ్రూప్-1 పేప‌ర్ లీక్, డీఎస్సీ నోటిఫికేష‌న్ విష‌యంలో తన గ‌ళం వినిపించారు. ఇప్పుడు గ్రూప్ 2, 3 పోస్టుల సంఖ్యను పెంచేలా కృషి చేస్తానని పేర్కొన్నారు. అలాగే GO-46 బాధితులకు తక్షణమే న్యాయం జరిగేలా జూన్‌లో నిరాహార దీక్ష చేపడతానని తెలిపారు. రెండు లక్షల ఉద్యోగాల క్యాలెండర్ తక్షణమే ప్రకటించేలా పోరాడుతానని పేర్కొన్నారు.
