IPl 2024| ధ‌నాధ‌న్ టోర్నీ ఐపీఎల్ 2024 ఎట్ట‌కేల‌కి ముగిసింది. దాదాపు రెండున్న‌ర నెల‌లు తెగ సంద‌డి చేసిన ఐపీఎల్లో ఎన్నో రికార్డులు నమోదయ్యాయి. పంజాబ్ సూప‌ర్ కింగ్, కేకేఆర్, ఆర్సీబీ, సన్ రైజర్స్ హైదరాబాద్ లాంటి టీమ్స్ త‌మ బ్యాటింగ్‌తో బౌల‌ర్స్‌కి మూడు చెరువుల నీళ్లు తాగించారు. టీ20లలో కూడా వారు పాత రికార్డులు చెరిపేయ‌డం విశేషం. ముందుగా ఐపీఎల్ చరిత్రలో అత్యధిక టీమ్ స్కోరు న‌మోదు చేసింది స‌న్‌రైజ‌ర్స్ హైదరాబాద్. ఆర్సీబీతో జరిగిన మ్యాచ్ లో సన్ రైజర్స్ హైదరాబాద్ 20 ఓవర్లలో ఏకంగా 287 రన్స్ చేసింది. ఒక ఇన్నింగ్స్ లో 287 టీ20 క్రికెట్ చరిత్రలో రెండో అత్యధిక స్కోరు కావడం విశేషం. ఇక పంజాబ్ కింగ్స్ ఐపీఎల్లోనే కాదు టీ20 క్రికెట్ లోనే అత్యధిక పరుగుల లక్ష్యాన్ని చేజ్ చేసిన జ‌ట్టుగా చ‌రిత్ర సృష్టించింది. ఈ ఏడాది ఛాంపియన్ కేకేఆర్ తో మ్యాచ్ లో ఏకంగా 262 రన్స్ టార్గెట్ చేజ్ చేసింది.
ఒక మ్యాచ్‌లో అత్యధిక సిక్స్‌లు కూడా ఈ సీజన్లోనే న‌మోదైంది. పంజాబ్ కింగ్స్, కేకేఆర్ మ్యాచ్ లో ఏకంగా 42 సిక్స్‌లు రావడం విశేషం. ఇక పంజాబ్ కింగ్స్ తన ఇన్నింగ్స్ లో 24 సిక్స్ లు బాద‌గా, ఒక ఇన్నింగ్స్ లో అత్యధిక సిక్స్ ల రికార్డు ఇదే. ఇక ఈ ఏడాది ఐపీఎల్లో అత్యధికంగా 1260 సిక్స్ లు నమోదయ్యాయి. గతంలో ఏ సీజన్లోనూ ఇన్ని సిక్స్ లు బాద‌లేదు. సన్ రైజర్స్ బ్యాటర్ అభిషేక్ శర్మ 16 మ్యాచ్ లలో 42 సిక్స్ లతో టాప్ లో ఉన్నాడు. టీ20 క్రికెట్ లో ఒక మ్యాచ్ లో అత్యధిక పరుగులు నమోదైన రికార్డు కూడా ఈ సీజన్లోనే రావడం విశేషం. ఏప్రిల్ 15న సన్ రైజర్స్, ఆర్సీబీ మధ్య జరిగిన మ్యాచ్‌లో ఏకంగా 549 పరుగులు నమోదయ్యాయి. సన్ రైజర్స్ 287, ఆర్సీబీ 262 రన్స్ చేశాయి.
టీ20 క్రికెట్ చరిత్రలో పవర్ ప్లే (మొదటి 6 ఓవర్లు)లో అత్యధిక రన్స్ చేసిన రికార్డును సన్ రైజర్స్ క్రియేట్ చేసింది. ఢిల్లీ క్యాపిటల్స్ తో మ్యాచ్ లో వికెట్ నష్టపోకుండా 125 రన్స్ వారు చేశారు. ఇక నాలుగు ఓవ‌ర్స్‌లో అత్యధిక పరుగులు ఇచ్చిన బౌల‌ర్‌గా మోహిత్ శర్మ నిలిచాడు. 4 ఓవర్లలోనే ఏకంగా 73 రన్స్ స‌మ‌ర్పించుకున్నాడు. ఇక ఐపీఎల్ 2024లో రాజస్థాన్ రాయల్స్ బౌలర్ చహల్ 200 వికెట్లు తీసుకున్న తొలి బౌలర్ గా నిలిచాడు. ఇక రాజస్థాన్ రాయల్స్ కే చెందిన ట్రెంట్ బౌల్ట్ ఐపీఎల్ చరిత్రలో తొలి ఓవర్లోనే అత్యధిక వికెట్ల రికార్డును న‌మోదు చేసుకున్నాడు. తొలి ఓవ‌ర్‌లో బౌల్ట్ తీసుకున్న వికెట్ల సంఖ్య 26కి చేరింది. ఐపీఎల్ చరిత్రలో అత్యధిక క్యాచ్ లు అందుకున్న రికార్డును విరాట్ కోహ్లి క్రియేట్ చేశాడు. అతడు మొత్తంగా 112 క్యాచ్ లు పట్టుకున్నాడు.
