హైద‌రాబాద్‌: కొట్లాడి తెచ్చుకున్న తెలంగాణలో మరో ఉద్యమానికి శ్రీకారం చుట్టాలని, రాష్ట్రంలో యుద్ధం ఇంకా మిగిలి ఉందని మాజీ ముఖ్యమంత్రి, బీఆర్ఎస్ అధినేత కేసీఆర్ (KCR) అన్నారు. ఉద్యమ శక్తులను మరోసారి పునరేకికరణ చేసి కార్యక్షత్రానికి రూపకల్పన చేస్తున్నట్టు చెప్పారు. రాజకీయ, సామాజిక అంశాల్లో వచ్చిన మార్పులు, రాష్ట్ర ప్రగతి తదితర అంశాలపై తెలంగాణ ఉద్యమకారుడు గోసుల శ్రీనివాస్‌యాదవ్ ఎడిటోరియల్‌ వ్యాసాలతో రూపకల్పన చేసిన సన్‌ ఆఫ్‌ ద సాయిల్ (భూమిపుత్రుడు) పుస్తకాన్ని ఎర్రవల్లిలోని వ్యవసాయ క్షేత్రంలో కేసీఆర్ ఆవిష్కరించారు. ఈ సందర్భంగా పుస్తక రచయిత, బీఆర్ఎస్ అధినేత గోసుల శ్రీనివాస్‌యాదవ్‌ను ప్రత్యేకంగా అభినందించారు. తెలంగాణ మలి దశ ఉద్యమంలో, తెలంగాణ ప్ర‌గతిని సాధారణ శైలిలో ప్రజలకు అర్థమయ్యేలా వివరించారని ప్ర‌శంసించారు.
త్వరలో ఉద్యమ రచయితలతో ఒక సమావేశం ఏర్పాటు చేసుకుందామ‌ని, రచయితలకు అన్ని విధాలుగా తోడుగా ఉంటాయ‌న్నారు. రచయితలు ప్ర‌జల పక్షాన ఉండాలని కేసీఆర్ ఈ సందర్భంగా సూచించారు. తెలంగాణ మలిదశ ఉద్యమంలో బావ వ్యాప్తి తో ఉద్యమం ఉదృతమైందని గుర్తు చేస్తూ మరోసారి కవులు కళాకారులు ఏకం కావలసిన అవసరాన్ని గుర్తు చేశారు.
కొట్లాడి తెచ్చుకున్న తెలంగాణ‌ను ఇప్పటికే కాంగ్రెస్ సర్కారు తిరోగమన దిశగా ఆలోచించడాన్ని తప్పు పట్టారు. కర్షకులు, కార్మికులు, నిరుద్యోగులు, వివిధ వర్గాలు కాంగ్రెస్ ప్ర‌భుత్వంలో అనేక ఇబ్బందులు పడుతున్నారని ఆవేదన వ్యక్తం చేశారు. పదేండ్ల తెలంగాణలో ప్రజలకు చిన్న ఇబ్బంది కలగకుండా చేశామ‌ని ఈ సందర్భంగా కేసీఆర్ తన పాలన మజిలీలను గుర్తు చేసుకున్నారు. కార్య్రకమంలో మాజీ మంత్రి హరీశ్‌రావు, బాలమల్లు, శరత్‌ తదితరులు పాల్గొన్నారు.
