Smriti Irani | కాంగ్రెస్ నాయకుడు రాహుల్ గాంధీ రాయ్‌బరేలి పార్లమెంట్‌ నుంచి పోటీ చేయనున్నారు. ఇందులో భాగంగా నామినేషన్‌ సైతం దాఖలు చేశారు. అయితే, వాస్తవానికి గత పార్లమెంట్‌ ఎన్నికల్లో రాహుల్ గాంధీ అమేథితో పాటు వయనాడ్‌ నుంచి బరిలోకి దిగారు. అమేథిలో బీజేపీ నాయకురాలు స్మృతి ఇరానీ ఆయనను ఓడించారు. తాజాగా వయనాడ్‌తో పాటు అమేథి నుంచి కాకుండా కాంగ్రెస్ కంచుకోట అయిన రాయ్‌బరేలీ నుంచి పోటీ చేస్తుండడంపై స్మృతి ఇరానీ స్పందించారు. అమేథిలో ఎన్నికలకు ముందే నెహ్రూ కుటుంబం ఓటమిని అంగీకరించిందని సెటైర్లు వేశారు.
రాహుల్ గాంధీ ఇక్కడి నుంచి వెళ్లిపోవడమంటే అమేథి ప్రజల విజయమేనన్నారు. గత ఐదేళ్లలో అమేథిలో ఎంతో అభివృద్ధి జరిగిందన్న ఆమె.. ఇందులో రెండేళ్లు కరోనాతోనే పోరాటం చేశామని.. మూడేళ్లలోనే అభివృద్ధి చేశామన్నారు. కానీ, నెహ్రూ కుటుంబం అమేథీని 50ఏళ్లుగా పట్టించుకోలేదని విమర్శలు గుప్పించారు. గాంధీలు అమేథిలో పోటీ చేయకపోవడాన్ని బట్టి చూస్తుంటే పోలింగ్‌కు ముందే ఓటమిని అంగీకరించారని.. గెలుస్తామని చిన్న ఆశ ఉన్నా వారే (రాహుల్ గాంధీ) పోటీ చేసేవారు. మరో అభ్యర్థిని నిలబెట్టకపోయేవారంటూ స్మృతి ఇరానీ చురకలంటించారు.
కేంద్రంలో మోదీ ప్రభుత్వం మూడోసారి అధికారంలోకి వస్తుందని, ప్రజల కోసం నిరంతరం పని చేస్తుందని స్మృతి ఇరానీ హామీ ఇచ్చారు. అమేథి ప్రజలు నెహ్రూ కుటుంబాన్ని 2019లో విడిచిపెట్టారని.. రాహుల్ గాంధీని అమేథి ప్రజలు మూడుసార్లు గెలిపించినప్పటికీ ఇక్కడి వారికి అందుబాటులో లేకుండా పోయారని విమర్శించారు. అభివృద్ధి చేయలేదన్నారు. రాయ్‌బరేలీలో కూడా గాంధీ కుటుంబం ప్రజలకు సేవ చేయలేదని.. అమేథీ తమను పక్కన పెట్టిందని వారికి తెలుసునన్నారు.
కేరళలో ఎన్నికలు ముగియగానే రాహుల్ గాంధీకి సురక్షితమైన సీటు కోసం కాంగ్రెస్ చూస్తుందని ప్రధాని మోదీ ఇటీవల వ్యాఖ్యానించారని గుర్తు చేశారు. వాస్తవానికి అమేథీ నుంచి రాహుల్, రాయ్‌బరేలి నుంచి ప్రియాంక గాంధీ పోటీ చేస్తారని భావించినా.. రాహుల్ కాంగ్రెస్ రాయ్‌బరేలి నుంచి పోటీ చేయగా.. అమేథి అభ్యర్థిగా కిశోర్ లాల్ శర్మను బరిలోకి దింపింది. కాగా, అమేథి, రాయ్‌బరేలి నియోజవకవర్గాల్లో మే 20న పోలింగ్ జరుగనున్నది.
