హైద‌రాబాద్‌: తెలంగాణ మంత్రిమండ‌లి సోమ‌వారం భేటీ (Cabinet Meeting) కానుంది. సీఎం రేవంత్ రెడ్డి అధ్య‌క్ష‌త‌న సోమ‌వారం మ‌ధ్యాహ్నం 3 గంట‌ల‌కు స‌మావేశం జ‌రుగ‌నుంది. ఎన్నిక‌ల కోడ్ నేప‌థ్యంలో కేంద్ర ఎన్నిక‌ల సంఘం కేబినెట్ మీటింగ్‌కు ష‌ర‌తుల‌తో కూడిన అనుమ‌తులు ఇచ్చిన విష‌యం తెలిసిందే. జూన్ 4వ తేదీలోపు చేయాల్సిన అత్య‌వ‌స‌ర విష‌యాల‌పై మాత్ర‌మే చ‌ర్చించాల‌ని, రైతు రుణ‌మాఫీ, ఉమ్మ‌డి రాజ‌ధాని అంశాల‌పై చ‌ర్చించొద్ద‌ని ఆదేశించింది.
వాస్త‌వానికి నిన్న స‌చివాల‌యంలో సీఎం రేవంత్ అధ్య‌క్ష‌త‌న కేబినెట్ భేటీ జ‌ర‌గాల్సి ఉండే. ఎన్నిక‌ల కోడ్ నేప‌థ్యంలో ఈసీ అనుమ‌తి కోసం రేవంత్‌తో పాటు మంత్రులంతా శ‌నివారం మ‌ధ్యాహ్నం నుంచి రాత్రి వ‌ర‌కు వేచి చూశారు. కానీ ఈసీ నుంచి అనుమ‌తి ల‌భించ‌లేదు. దీంతో రాత్రి 7 గంట‌ల‌కు సీఎంతో పాటు మంత్రులు స‌చివాల‌యం నుంచి వెళ్లిపోయారు.
రైతు రుణ‌మాఫీ, ధాన్యం కొనుగోళ్లు, ఖ‌రీఫ్ పంట‌ల ప్ర‌ణాళిక, రైతుల‌కు సంబంధించిన కీల‌క విష‌యాలు, జూన్ 2న తెలంగాణ ఆవిర్భావ దినోత్స‌వాల నిర్వ‌హ‌ణ, రాష్ట్రం ఏర్ప‌డి ప‌దేండ్లు పూర్తవుతున్న సంద‌ర్భంగా పున‌ర్విభ‌జ‌న చ‌ట్టంలో ఇప్ప‌టి వ‌ర‌కు ఏపీ, తెలంగాణ మ‌ధ్య పెండింగ్‌లో ఉన్న అంశాల‌ను కేబినెట్ భేటీలో చ‌ర్చించాల‌ని సీఎం నిర్ణ‌యించారు.
